Soi un vieḥo prematuru. Non, nun lo digo porque me presten los carajillos lo mesmo que un llápiz a un fatu. Tampoco nun lo digo porque seya feliz con un dominó y una baraxa. Nin siquiera dígolo pola mio costume de mirar les obres y recalcar lo torcíos que xuben los encofraos. Eso namái que lo faigo por putear.
Non, soi un putu vieyu prematuru porque la mio vida ríxese pola másima “hai mui poques coses na vida poles que mereza la pena sacar les manes del bolsu”
Seya iviernu, seya branu, voi coles manes en bolsu.
Faiga sol o llueva, garro’l paragües cola boca y llevo les manes en bolsu.
Vengo de mercar el pan nel Alimerka y llevo la barra embaxo’l brazu coles manes en bolsu, a lo franchute.
Aporto a un semáforu d’esos de calcar nel botonín, y púlsolu col coldu por nun sacar les manes del bolsu.
Fáigome una paya metanes la cai y nun saco les manes del bolsu, que asina canta menos.
En fin, Freud de xuru diría qu’el bolsu representa nel mio inconsciente la vaxina la mio ma y les manes el mio falu, y que ta claro que teo un complexu Edipo ensin superar. Pémeque namái que soi un putu vagu y que de la que voi pela cai nun me presta sacáles del bolsu mas que pa prendeme un cigarru (Voi pela cai fumando y coles manes en bolsu, soi un putu vieyu dafecho)
Y entós atópome con un gran problema:
El mundiu ta diseñáu pa llevar les manes albentestate.
Y entós, al contrariu que l’amigu Leibniz, decátome de que nun vivimos nel meyor de los mundos posibles. Esi mundiu tendría de permitir, polo menos, poder facer delles xeres coles manes en bolsu.
La primera cairá en gracia nun solo d’aquellos a los que -yos preste llevar les manes abrigaes, sinon tamién a cualisquiera que mexe fuera casa.
Y ye que, un empovina pa la puerta un vater públicu, pónse a abrila, y atópase que la mui castrona abre pa dientro. Abrir pa dientro supón char la mano a la maniella pa abrir la puerta. Maniella que normalmente ta moyá. Cosa que da noxu abondo.
Nel meyor de los mundos les puertes son como les de la cocina de los chigres, abren nes dos direiciones si les emburries. Sales del vater, emburriesla adulces col pies y ya ta la puerta abierta. Y nun tienes nin que remolete por la cerrar. ¡Too ventaxes!
Otra cosa que me tien podríu ye eso de que nel autobus nun pueas dir de pies y coles manes en bolsu. Bono, poder si que pues, pero al primer frenazu vas metete tal hostia que van sácate a hombros por gallu.
Nel meyor de los mundos, porqu’esti ta ensin facer, tien d’haber un cordelín o un cintu u te pueas enganchar pela centura, y asina nun tienes nin que espernancate más de la cuenta.
Y lo pior de too, ye que coles manes en bolsu, nun pues llevar les dos manes cruciaes na espalda. Vieyu style.
Nun mundiu meyor tendríemos cuatro brazos, dos pa los bolsos y dos pa cruciar. Y tamién ya de pidir, Belén Pesteban taría ramplando na décima. Ye mas, camudába toles otres coses por vela tirar de regaera. Bruxa…
